Sγur Salman al-Awdah
Yella yettali tiṣeddarin s leḥṛaṛa, ur tettamneḍ 84 n yiseggasen ay yesεa deg tudert-nnes. Yuγ lḥal, mazal-it yejhed am yilemẓi. Sakkin, ẓriγ d acu ay d tasebba n waya. Γas yezwej deg 1947 (akken kan yeqfel 30 n yiseggasen), yenna-iyi-d : « Ur cfiγ yella wass aydeg rfiγ γef tmeṭṭut-inu, u lemmer tikkelt. Ula d nettat, werjin cfiγ terfa fell-i, yerna werjin sserfaγ-tt. Nnig waya, asmi ara iyi-yeqreḥ yiγef-inu, werjin yettas-itt-id nadam arma ṭṭseγ nekk, d amezwaru ».
Sakkin, yerna-d : « Ur zmireγ ad xayleγ iman-inu ddiγ anda n kra war ma tedda yid-i, ula mi ara ffγeγ ad d-qḍuγ, yerna dima ttaṭṭafeγ-tt seg ufus. Mazal-aγ dima am wussan-nni imezwura aydeg nezwej. » Asmi ay tuḍen tmeṭṭut-nnes, sakkin teqqel ur tezmir ad tesεu igerdan, yenna-as : « Akken yebγu yili, kemm εzizeḍ fell-i ugar n dderya ». Yerna yanna-iyi-d : « Skud mazal-itt tetteddu γef tegnit (lqaεa), werjin zemreγ ad xayleγ iman-inu uγeγ tameṭṭut niḍen ».
Argaz-a d amedya (lemtel) n win ay iqeddcen seg wul akken ad yessefṛeḥ tameṭṭut-nnes, d win ay yesεan ajajig’ n tayri ijehden, ay yettdumun d iseggasen war ma yenqes. D acu kan, nesḥissif imi amur ameqran deg yibusinen (couples), ama d imeẓyanen neγ d imeqranen beεden aṭas akken ad ilin am wergaz-a, wanag qlil aṭas anda ay nezmer ad d-naf argaz am wa, bitt, nezmer ad d-nini argaz am wa d uktu (idéal) yerna drusit medden ay izemren ad awḍen ad ilin am netta. D ayen ibanen, amdan ur yettuḥettem ad yili swaswa kan am wergaz-a. D acu kan, seg tama niḍen, ur yessekf ad neṛju seg wecrik-nneγ n tudert akken ad yili am wergaz-a neγ am tmeṭṭut-nnes yili nekni s timmad-nneγ neccuṛ d leεyub ay yessekf ad ten-nṣeggem deg yiman-nneγ.
Zzwaj d tadukli yebnan γef tayri ed leḥnana
Yenna Ṛebbi deg Leqran :
« Seg yisekniyen-Nnes : Yexleq-awen, seg-wen, tilawin-nwen akken ad teddrem yid-sent deg talwit. Iga gar-awen tayri ed leḥnana. Deg waya, s tidet, llan yisekniyen i yemdanen yettmeyyizen ». (Taṣuret n Ṛṛum 30 ; laya tis 21)
Γef waya ara naf ul n wergaz dima tjebbed-it tmeṭṭut, am wakken daγen tameṭṭut ijebbed-itt wergaz, amzun yal yiwen seg-sen yettnadi γef wezgen-nnes deg wayeḍ. Abu Rabi’ah, yellan d lqaḍi n Yinselmen, asmi ay as-temmut tmeṭṭut-nnes, d netta s timmad-nnes ay tt-imeḍlen s yifassen-nnes. Sakkin, mi d-yeqqel s axxam, ur yessaweḍ ad yeṭṭef lqerḥ-nnes, yeṭṭerḍeq d imeṭṭawen, yenṭeq γer Sidi Ṛebbi : « Imir-a, ula d axxam-inu yemmut. Axxam yedder kan s tmeṭṭut-nni ay t-izedγen ».
Tayri gar wergaz ed tmeṭṭut-nnes d tin ay yeḥwajen aṭas n wussisen (lmejhud) ama seg wergaz, ama seg tmeṭṭut, akken ad teqqim dima tedder. Uguren n tudert n zzwaj ur d imennuγen-nni imecṭuḥen ay d-yettilin yal ass, yerna ineggura-a d aḥric seg tudert n yal argaz akked tmeṭṭut-nnes. Yuγ lḥal, uguren-a imecṭuḥen tikkal ttekkayen ula deg ussider ed ussejhed n wassaγen gar wergaz ed tmeṭṭut-nnes, am leεqaqer-nni ay irennun lbenna i wucci.
Uguren n tidet ttekken-d seg kraḍ n tγawsiwin :
1. Tikkal, amdan, mi ara yezwej, ur izemmer ad yefhem acrik-nnes n tudert. Tikkal, amdan-nni ur yezmir ad yefhem ula d iman-nnes.
2. Tikkal, mi ara yezwej wemdan, ur izemmer ad yennam tudert n zzwaj, ladγa ibeddilen-nni ay d-yettilin deg tudert-nnes tamaynut. Aṭas n medden ay yettγilin tudert-nsen sdeffir n zzwaj ad teqqim swaswa kan am tin n uqbel n zzwaj, yili aya ur iṣeḥḥa.
3. Maca ugur icaεen ugar deg zzwaj netta aṭas n medden, mi ara zewjen, ur sεin icuddan ijehden, lqayen, γer wecrik-nsen n tudert, yerna ur sεin lebγi ed nneyya zeddigen i wakken icuddan-nni ad dumen. Γef waya ay yessekf ama γef wergaz, ama γef tmeṭṭut, ad fehmen « ilugan (règles) n wurar » deg wayen yerzan tayri gar wergaz ed tmeṭṭut-nnes.
Iberdan ayyes ara tdum tayri
Imi tayri gar wergaz ed tmeṭṭut-nnes tezmer ad taḍen yerna tezmer ad taweḍ ula γer tmattant, d lwajeb ama γef wergaz, ama γef tmeṭṭut, ad qeddcen dima i wakken ad d-rren tudert i tayri yellan gar-asen yerna ad as-ḍemnen ad tdum. Γef waya ay yessekf ad ḍefren tiγawsiwin-a :
1. Argaz ed tmeṭṭut-nnes yessekf ad snamen i yiman-nsen ad ttemyinin tiγawsiwin yelhan, icebḥen, yal wa ad yeckeṛ wayeḍ, yerna yal wa ad as-yedεu s lxir i wayeḍ.
Yezmer wergaz ad as-yini i tmeṭṭut-nnes : « Lemmer d ay iyi-mazal meẓẓiyeγ yerna werεad zwijeγ, ala kemm ara ferneγ ad kem-aγeγ ». Ula d tameṭṭut-nnes tezmer ad as-tini awal am wa. Awalen n leḥnana ttḥazen amdan deg wul yerna ssefṛaḥen-t, yerna tameṭṭut tettḥulfu-asen ugar n wergaz. Ya, llan aṭas n yergazen ur nesεi nneyya, ur nettagad Ṛebbi, d iles aẓidan ay sseqdacen akken ad d-rebḥen tisednan (tilawin) n wiyaḍ. Awal aẓidan irebbeḥ-d ul n tmeṭṭut. Γef waya ay yessekf γef wergaz ad yesnam i yiman-nnes ad yessawal s leḥnana i tmeṭṭut-nnes qbel ad yili wayeḍ ara igen aya deg wemkan-nnes.
2. Argaz ed tmeṭṭut-nnes yessekf ad snamen i yiman-nsen ad ttemyexdamen tiγawsiwin timecṭuḥin, maca sεant azal ameqran. Lemmer ad d-yekcem wergaz s axxam, ad d-yaf tameṭṭut-nnes teṭṭes, yezmer ad tt-idel akken ur tt-ineγγ usemmiḍ. Yezmer, daγen, wergaz, ad yesnam i yiman-nnes ad as-d-iγer i tmeṭṭut-nnes seg lxedma akken kan ad yetter fell-as, yerna akken kan ad tẓer yettxemmim fell-as. Tameṭṭut, ma tufa-d argaz-nnes yettnudum, tezmer ad tessuden γef wenyir, γer ma tettxemmim ur iḥulfa i waya. Deg tidet, ula mi ara yeṭṭes wemdan, mazal tafekka-nnes (ljetta) tezmer ad taki i kra n tγawsiwin, yerna argaz yezmer ad iḥulfu i ussuden-nni ed yizen-nni (message) n leḥnana ay as-tga tmeṭṭut-nnes.
Amazun (Nnbi), taẓallit ed sslam n Ṛebbi fell-as, yebder-d azal ay sεant tγawsiwin-a timecṭuḥin : « … ula d talqimt-nni ara tegreḍ deg yimi n tmeṭṭut-nnek » (Ulsen-t-id Buxari ed Muslim). Yuγ lḥal, yezmer ad yili Umazun yeqsed-d, da, idrimen ay yettṣerrif wergaz akken ad as-d-iseγ i tmeṭṭut ayen teḥwaj. D acu kan, tella tsebba ayγef yefren Umazun ad yesseqdec awalen-a. Akken yebγu yili, yessekf ad nẓer awal-a yesskanay-d yes-s Umazun amek ay yella netta s timmad-nnes itteddu akked wayt wexxam-nnes. Deg tidet, tiγawsiwin-a timecṭuḥin, yal amdan yezmer ad tent-yeg akken yessen, akken ay as-yehwa. Wid ur nennum, ahat ad ḥwijen kra n wakud (lweqt) i waya, d acu kan, deg tidet, aya ur yeḥwaj aṭas n wussisen (lmejhud). Kra n medden ur nennum tiγawsiwin-a, zemren ad ssetḥin ula mi ara asen-d-nessiwel fell-asent, yerna smenyafayen ad jjen kullec akken yella wala ad kfen cwiṭ n leεtab i teṛwiḥt akken ad beddlen tikli-nsen. Γas akken, yessekf γef wemdan ad yili yewjed akken ad yessekcem tiγawsiwin timaynutin deg tudert-nnes ma yella yebγa ur yettidir dima deg wuguren.
3. Argaz ed tmeṭṭut-nnes yessekf ad gen cwiṭ n wakud i yiman-nsen, d win aydeg ara zemren ad ssiwlen gar-asen war ma yegzem-iten yiwen. S waya, zemren ad qeṣṣren γef wayen yezrin (iεeddan), ad d-mmektin tiswiεin icebḥen ay kkan lwaḥid deg tudert-nsen, ad d-mmesmektayen ccfawat-nsen icebḥen akken ur tent-ttettun yerna ad ḥulfun amzun iḍelli-nni kan ay ḍrant. Zemren ad qeṣṣren γef yimal (futur), yal yiwen seg-sen ad d-yeḥku γef wayen yessaram ed wayen yessefray ad t-yeg seg-a γer sdat. Daγen, zemren ad qeṣṣren γef yimir-a, ama γef wayen yelhan, ama γef wayen n diri, ed wamek ara d-afen tifratin akken ad frun uguren-nsen.
4. Argaz ed tmeṭṭut-nnes yessekf ad ilin mqaraben ula seg yidis n tfekka (ljetta), yerna aya yetturar dduṛ d ameqran deg wassaγ-nsen (relation). Yuγ lḥal, argaz ur yessekf ad yeqreb γer tfekka n tmeṭṭut-nnes deg teswiεt-nni kan n wassaγen azfiyen (relations sexuelles), wanag yessekf ad yili dima yeqreb γer-s, ama mi ara qqimen deg wexxam, ama mi ara tteddun deg webrid, yerna yessekf fell-asen ad kksen assetḥi deg temsalt-a, γas ma yella mazal ar ass-a irgazen ay yettsetḥin ad ten-ẓren medden akked tsednan-nsen deg beṛṛa.
5. Argaz neγ tameṭṭut yessekf dima ad bedden γer yidis n wecrik-nsen n tudert deg tegnit n lḥeṛs neγ n leḥzen. Mi ara tili tmeṭṭut s tadist neγ deg tallit-nnes n tarda (période menstruelle), tezmer ad teḥwij leḥnana sγur wergaz-nnes, yerna aneggaru-a yessekf ad yefhem tagnit iweεṛen aydeg tella tmeṭṭut-nnes mi ara tili s tadist, neγ tuweḍ-itt-id tarda-nnes, neγ mi ara tesṛuḥuy idammen sdeffir ma terba-d, ladγa imi tameṭṭut, deg talliyin-a, tεeyyu seg yidis n tnefsit, yerna aya yezmer ad as-yessexṣer ḍḍbiεa-nnes. Deg teswiεin am ti ay tetteḥwiji tmeṭṭut tallalt (εiwen) n wergaz-nnes. Yuγ lḥal, teḥwaj seg wergaz-nnes ladγa ad as-d-yessken tesεa azal ameqran deg wul-nnes, yerna yeḥwaj-itt deg tudert-nnes.
Daγen, tikkal, d argaz ay yettaḍnen neγ iseεεu iguren imeqranen, dγa ula d tameṭṭut yessekf ad tekf azal i wanect-a. Ma bγan medden ad dumen wassaγen-nsen (relations) n zzwaj, yessekf yal yiwen seg-sen ad as-yekkes tugdi i wayeḍ ed ad yebded γer yidis-nnes deg tegnit n lḥeṛs.
6. Asekf (cadeau) d taγawsa niḍen ay d-yesskanayen tayri.
Argaz neγ tameṭṭut zemren ad myehdun isekfa (cadeaux) ula beṛṛa i teswiεin-nni aydeg heddun medden asekf (am deg tallit n lεid). Yuγ lḥal, takunt (surprise) icebḥen dima tessefṛaḥ bab-nnes.
Asekf (cadeau) yelhan d win ay d-yesskanayen d acu ay yettḥulfu yiwen i wecrik-nnes n tudert. Nnig waya, ur yelli d ccerḍ ad yili usekf-nni γlay, wanag yessekf kan ad yili iwuta ayen ay iḥemmel win umi ara t-nekf ; s waya, aneggaru-a ad t-yiεziz fell-as yerna ad t-yejmeε am ugerruj.
7. Ama d argaz, ama d tameṭṭut, yessekf yal yiwen seg-sen ad yelmed amek ara iqader wayeḍ ed ad yeqbel leεyub-nnes. Yessekf γef yal yiwen seg-sen ad ittettu tuccḍiwin timecṭuḥin n tudert yerna werjin ad tent-id-yebder, yerna aya yessekf ad yekcem deg ḍḍbiεa-nsen. Tasusmi γef tγawsiwin-a ur nesεi azal d ayen ara yejjen amdan ad yesεi ḍḍbiεa tuṛzint, d tumεint. Yiwet n tikkelt, tusa-d yiwet n tmeṭṭut γer Σica, ad Iraḍi Ṛebbi fell-as, tenna-as: ”Mi ara d-yekcem wergaz-inu γer wexxam, itteqqal am wemcic. Maca, mi ara yeffeγ γer beṛṛa, ad as-tiniḍ d izem. Yerna werjin ittetter-iyi γef wayen giγ s wayla-nnes”. (Ulsen-t-id Buxari ed Muslim).
Ibn Ḥajar yessefhem-d awal-a, yenna-d : « Tameṭṭut-nni teqsed-d argaz-nnes d win yettakfen war leḥsab yerna yettqadar tameṭṭut-nnes. Ur tt-yettnaγ γef wayla-nnes neγ γef yedrimen-nnes mi ara ten-sqedcen wayt wexxam. Ma yeqḍa-d kra s axxam, ur ten-yettḥasab γef wacu ay gan yes-s. Yerna, ur yessemγar ddeεwa γef leεyub n yiεeyyalen n wexxam, wanag iṛeḥḥem-iten yerna ifehhem-iten akken iwata ». Yuγ lḥal, ma yella yiwen ad yessemγer ddeεwa γef leεyub n wayeḍ, yili netta s timmad-nnes yesεa leεyub, aya d lbaṭel. Yella ula d anzi ay as-yettinin : « Amdan yettwali aγebbar yellan deg tiṭ n gma-s, maca ittettu ilefḍan yellan deg tiṭ-nnes ».
8. Argaz ed tmeṭṭut-nnes yessekf ad ttemsefhamen γef tmasiyin-nsen (responsabilités) ed tlufa ay ten-icerken akked wamek ara tent-frun, am tteṛbeyya n yigerdan, aqeddic, assikel (voyage), aṣerref γef wexxam ed wakk uguren ay izemren ad swaγen assaγen-nsen (relations) ma yella ur asen-bdiden akken yessekf.
9. Argaz ed tmeṭṭut-nnes yessekf ad ttgen tiγawsiwin ayyes ara skecmen lfeṛḥ γer tudert-nsen.
Γef umedya (lemtel), zemren ad γren lwaḥid adlis n tudert n Umazun (Nnbi), taẓallit ed sslam n Ṛebbi fell-as, neγ ad slen i tesfifin ara as-d-yekfen tikta γef wamek ara d-rren tudert i wassaγen-nsen (relations) n zzwaj ed wamek ara ten-rren d imeṛkantiyen.
Zemren, daγen, ad beddlen tinumyin-nsen (leεwayed) deg wayen yerzan asgunfu, ucci, acebbeḥ n wexxam, amek ay itteddu yal yiwen seg-sen i wayeḍ, ama deg wexxam, ama deg beṛṛa.
Yuγ lḥal, tiγawsiwin-a akk ttajjant ama d argaz, ama d tameṭṭut, ad ilin dima ukin yerna bedden akken iwata i wassaγen-nsen (relations).
10. Yessekf γef wergaz ed tmeṭṭut-nnes zzwaj-nsen seg tγawsiwin tibeṛṛaniyin ay izemren ad t-swaγent. Yiwet seg tγawsiwin n diri akk ay izemren ad ḥazent zzwaj nettat mi ara iqaren yiwen seg-sen acrik-nnes n tudert γer wemdan niḍen. Aṭas n yergazen ay yettqaranen tisednan-nsen γer tsednan n wiyaḍ. Llan ula d wid ay tent-yettqaranen γer tsednan-nni ay ttwalin deg tesγunin (magazines) neγ deg tilibizyu. Ula d tisednan ttqaranent irgazen-nsent γer wid n tsednan niḍen, ladγa deg wayen yerzan timmeṛkantit, ccbaḥa neγ tuffγa akked tsednan-nsen. Aqaren-a akk diri-t imi ay yessawaḍ amdan ad yeḥqer iman-nnes, yerna aya yezmer ad yeswaγ s tγawla assaγen (relations) gar wergaz ed tmeṭṭut-nnes.
Ma yella nebγa ad nqaren iman-nneγ γer wiyaḍ, yessekf ad nqaren iman-nneγ γer wid ay nif. Amazun (Nnbi), taẓallit ed sslam n Ṛebbi fell-as, yenna : « Ttmuqqulem γer wid yellan ddaw-atwen, ur γer wid yellan nnig-wen. Axir-awen aya i wakken ur tḥeqqrem nneεma n Ṛebbi fell-awen ». (Ulsen-t-id Buxari ed Muslim).
S waya, yessekf fell-aγ ad nelmed ad nedder deg tilawt (réalité) yerna ad nesteqneε kan s wayen ay aγ-Yura Ṛebbi. Ur yessekf ad neḥsed wiyaḍ γef wayen ay asen-Yefka Ṛebbi. Yuγ lḥal, ula d cwiṭ-nni ay nesεa yezmer ad yesεu azal ameqran ma nessen amek ara t-nesseqdec akken ad d-nekkes seg-s lfayda.
Deg tidet, ur yelli d awezγi amur ameqran seg wid yettzuxxun s yiman-nsen ddren d iseεdiyen akked yecriken-nsen n tudert d tikerkas kan ay skerkisen. Γas ma nettwali tibḥirt n ljiran-nneγ d tazegzawt γef tin-nneγ, ur yessekf nqaren iman-nneγ γer-sen, acku, yezmer lḥal, ma nqerreb γer-s, ad tt-naf ur yelli wayen izaden deg-s.
Sγur Salman al-Awdah
Tasuqilt: Omar Mouffok (Tiddukla Tadelsant Imedyazen – www.imedyazen.com)
Taγbalut: http://www.sajidine.com/