Sγur Dino (http://www.pictures-of-cats.org/)

D ayen ibanen, tudert igerrzen akk ay yezmer ad tt-yedder wemcic yettuṛebban, deg wexxam kan ay tezmer ad tili. Yuγ lḥal, mi ara yili deg wexxam, amcic ad yaf ṛṛaḥa akk ay as-yessekfen, yerna ad itteffeγ kan γer beṛṛa akken ad yessen tiγawsiwin n umaḍal aweḥci. Mi ara yeffeγ, amcic yettḥeṛṛib (entraîner) ccehwat-nnes tiweḥciyin am ccehwa n ṣṣyada neγ tin n tazzla, maca mi ara yeεyu, s axxam ara d-yeqqel akken ad yesteεfu, ladγa ma gan-as yimawlan-nnes usu deg wexxam.

D acu kan, deg kra n yimukan, am deg temdinin (ama deg tlemmast neγ deg ḍḍerf n temdint), tuffγa n wemcic n wexxam γer beṛṛa d ayen ay izemren ad t-iḍurr mliḥ. Aṭas n yemcac ay kkatent tkeṛwas, yerna zemren ad d-mlilen ula akked yiḍan neγ imdanen ay izemren ad ten-ḍurren. Mi ara ffγen yemcac γer beṛṛa, zemren daγen ad ccen acecci (ssem) ay izemren ad ten-ineγ. Deg tmura tisemmaḍin am Yiwunak Yeddukklen, madden sseqdacen yiwen n ufaris (produit) ay yessefsayen agris, yerna win ara yeccen afaris-a, yezmer ad yemmec. Mi ara kken yemcac γef ufaris-a, sakkin, meccḥen iḍarren-nsen, aya yezmer ad ten-ineγ. Llan kra n leṣnaf n ufaris-a ay d-yettwaxedmen akken ur ttḍurrun iγersiwen yettuṛebban. Yuγ lḥal, ayen yettḍurrun deg ufaris-nni netta d aglikul n yitilan (glycol d'étylène), dγa sseqdacen deg wemkan-nnes aglikul n wepṛupilan (glycol de propylène), maca ula akken, afaris-nni n ussefsi n wegris yezmer ad iḍurr amcic, imi, tikkal, yettarra-t ur yezmir ad yeḥkem deg wewliwel-nnes, yerna yezmer ad yesεu ula d tizγinin (crises). Γas ma yella assebleε n ufaris-a aneggaru ur t-yessawaḍ γer tmattant, maca ma yella amcic ur yezmir ad yeḥkem deg yiman-nnes, aya yezmer ad t-iḍurr s waṭas.

Imcac zemren daγen ad nḍerren neγ ad mmten mi ara ccen ayen ay ssersen madden i yiγerdayen. Tikkal, mi ara ccen aγerday yeccan acecci (ssem), ula d nitni zemren ad aḍnen neγ ad mmten. Kra n yemγan ay yezmer ad d-yaf wemcic deg beṛṛa zemren daγen ad t-ḍurren, imi ay zemren ad as-d-gen aqraḥ deg tεebbuḍt, am waken ay zemren ad as-ssizzlen taεebbuḍt-nnes, neγ zemren ad as-d-gen uguren deg wul, deg tegẓal-nnes neγ deg unagraw-nnes (système) n uneffes. Kra n yemγan, lemmer ad ten-yecc wemcic, zemren ad as-d-gen ula d tizγinin (crises) aydeg ara t-ṭṭfent lwihnat.

S waya, a win yufan, win yebγan ad iṛebbi amcic-nnes deg wexxam kan, ur yessekf ad t-yejj ad yeffeγ γer wezniq, wanag amkan n beṛṛa yelhan akk i wemcic netta d tibḥirt yettwaẓerrben, d tin aydeg yezmer ad yurar war ma tella tγawsa tabeṛṛanit ara t-iḍurren. D acu kan, ma yerwel wemcic seg tebḥirt, yezmer daγen ad d-yemlil akk imihiten-nni (dangers) ay d-nebder. Seg tama niḍen, tikkal, ula mi ara yili wemcic yettγimi kan deg wexxam akked tebḥirt, zemren ad d-kecmen γer-s yiγersiwen ibeṛṛaniyen. Tikkal, keccmen-d yiḍan n ljiran kra n tebḥirin, am wakken ay zemren daγen ad d-kecmen yiγersiwen iweḥciyen ma yella asefreg n tebḥirt ur yelhi. Yuγ lḥal, tikkal, ula mi ara yili yelha, zemren ad d-kecmen seg-s yizerman, imi wi zemren ad kken ula seg yimerjan imecṭuḥen, yerna zemren ad nγen amcic.

Wid yesεan tibḥirin-nsen deg tmurt, zemren ad tent-id-kecmen daγen yemcac iweḥciyen. Maca, deg tmurt am Yiwunak Yeddukklen, yiwen seg yimihiten (dangers) imeqranen ay yettmagaren imcac deg tebḥirin n yimawlan-nsen netta d imdanen ibeṛṛaniyen.

Yuγ lḥal, deg tmurt-a, aṭas n tedyanin ay iḍerrun aydeg inubiyen (adolescents) ur nessin ad uraren, keccmen γer tebḥirin n madden akken ad as-d-akren imcac-nsen, sakkin tturaren yes-sen yir urar aydeg ttεettiben-ten, ttεeyyiben-ten, sserγayen-ten neγ neγγen-ten. Llan ula d kra n yinubiyen ay ibeγγun ad lemden aḥakeṛ s ubeckiḍ, dγa d imcac n madden ay ttḥakaṛen ad ten-nγen. Nnig waya, mi ara d-yaf yiwen amcic-nnes yemmut neγ yettuεeyyeb deg tebḥirt-nnes, imsulta (ibulisen), ur ttakfen azal ameqran i temsalt-a, ala ma yella yemmut s lbaṛud, imi ur ḥemmlen “ad ḍeyyεen akud”-nsen deg temsal-a, yerna ad as-inin kan i bab n wemcic-nni “d aγersiw abeṛṛani ay d-yemmγen fell-as”.

Ma yella ur d-ttafen amcic-nni deg tebḥirt, imsulta (ibulisen) ad as-inin kan i bab-nnes “yerwel”. Akken yebγu yili, deg waṭas n tikkal, wid-nni ay igan taxeṣṣart sellken seg uεaqeb yerna d aya ara ten-yejjen ad tt-alsen tikkelt niḍen.

Γef ljal n tγawsiwin ay d-bedreγ sufella-a ay yessekf γef wemdan, deg kra n yimukan, ad iṛebbi kan amcic-nnes deg wexxam. D acu kan, yessekf γef bab n wemcic ad yelmed amek ara iḥudd amcic-nnes ula daxel n wexxam, imi aneggaru-a yezmer ad iḍurr iman-nnes s kra n tγawsiwin. Ifarisen (produits) n ussizdeg n wexxam ay izemren ad ḍurren amcic lemmer ad ten-yecc yessekf ad ten-rren wayt wexxam deg texzanin iγelqen wuγur ur izemmer wemcic ad yaweḍ.

Daγen, imi amcic iḥemmel ad yurar s tγawsiwin ay yettaf deg wexxam, yessekf γef bab-nnes ad yessebεed fell-as akk tiγawsiwin imesden (iqeḍεen), ayyes yezmer wemcic ad yejreḥ iman-nnes. S waya, yessekf γef bab n wexxam ad yessebεed tiγawsiwin yettḍurrun amcic swaswa kan akken ay yessebεad tiγawsiwin ay izemren ad ḍurrent agrud. S waya, sdaxel wexxam, bab n wemcic yezmer ad yeḥkem xir deg tγawsiwin ay izemren ad ḍurrent amcic-nnes. Seg tama niḍen, yezmer daγen ad yeḍfer xir tikli (comportement) n wemcic-nnes yerna ad t-iεass γef waḍḍanen, imi daxel wexxam, bab n wemcic yezmer ad yaki s tazzla i wemcic-nnes ma yuḍen.

Yuγ lḥal, i lmend n tezdeg, amcic yesεa, deg wexxam, tasenduqt yeccuṛen d akal aydeg yessemsax. S waya, bab-nnes yezmer ad iger tamawt i wammus-nni n wemcic neγ i yibezḍan-nnes ma llan deg-sen yidammen, yerna ad as-yaki ma yuḍen, deg wakud aydeg lemmer amcic-nnes ad yessemsax deg beṛṛa, ad yewεeṛ fell-as ad as-yaki ma yuḍen.

D acu kan, amcic yettγimin kan deg wexxam yessekf ad yesεu kra n tγawsiwin seg tid-nni ay yettaf deg beṛṛa. Yuγ lḥal, amcic yeḥwaj ad yurar ed ad yewliwel. Γef waya ay yessekf γef bab-nnes ad as-d-iseγ neγ ad as-d-yeg tiγawsiwin ayγef ara yettaley, ad as-yessers asγar ara ikerreb s waccaren-nnes (i wakken ur ikerreb lqecc n wexxam), yerna ad as-yekf ilellac (jouets) ayyes ara yetturar ed ad yessedhu iman-nnes. A win yufan, ula d ayt wexxam ad tturaren, tikkal, akked wemcic-nni, d acu kan, imdanen ur zmiren ad tturaren kra yekka wass akked wemcic imi ay sεan lecγal yerna terra-ten tmara, daγen, ad ffγen seg wexxam akked ad frun kra seg lecγal-nsen. Γef waya ay yessekf γef bab n wexxam ad as-yeg akk ttawil iwutan i wemcic akken ad yessedhu iman-nnes, γas ur llin wayt wexxam deg wexxam.

Yessekf daγen ad nẓer imcac d iγersiwen ay d-yettduqqusen ugar mi ara d-tecreq tafukt neγ mi ara teγreb. S waya ara naf imcac tteḥdiqiren aṭas mi ara ilin madden mazal-iten ṭṭsen. Γef waya ay yelha, tikkal, ad yesεu wemdan amcic wis sin deg wexxam, imi imcac, mi ara ilin deg sin yid-sen, zemren ad mwanasen yerna ad msedhun deg teswiεin-nni aydeg imdanen ur stufan ad uraren yid-sen. Nnig waya, sin n yemcac deg wexxam zemren ad qqlen am waytmaten, yal yiwen seg-sen ad iεawen wayeḍ, ladγa mi ara yili yiwen seg-sen d amuḍin neγ iga tamhelt (apaṛasyun). Yuγ lḥal, amcic yuḍnen, mi ara iwali gma-s yetturar, aya ad t-iwanes yerna ad as-d-yeg lebγi ula i netta ad yurar. D aya ara t-iεawnen akken ad yeḥlu. Deg tidet, amcic yesεan amcic niḍen d amwanes-nnes deg wexxam, ur yettḥulfu i lxiq mi ara γaben yimawlan-nnes, imi ay zemren ad uraren, am wakken ay zemren ad ttqeyyilen kifkin.

Yuγ lḥal, tiγimit n wemcic ama deg beṛṛa, ama daxel wexxam, tesεa lfayda am wakken ay tesεa lmaḍerra, yerna ala d bab n wemcic ay izemren ad iẓer d acu ay iwutan i uγersiw-nnes γef leḥsab n tegnit aydeg yella ed wemkan aydeg yezdeγ.

Sγur Dino (http://www.pictures-of-cats.org/)

Tasuqilt sγur : Omar Mouffok (Tiddukla Tadelsant Imedyazen - www.imedyazen.com)