| 
  • If you are citizen of an European Union member nation, you may not use this service unless you are at least 16 years old.

  • Want to get organized in 2022? Let Dokkio put your cloud files (Drive, Dropbox, and Slack and Gmail attachments) and documents (Google Docs, Sheets, and Notion) in order. Try Dokkio (from the makers of PBworks) for free. Available on the web, Mac, and Windows.

View
 

Mciweṛ neγ ur ttemcawaṛ ed Isṛayil

Page history last edited by Taftilt Taliktrunit 11 years, 2 months ago

 

 

Sγur Robert Bibeau

 

24 Γuct 2010

 

 

Wid yettnaγen i lmend n tlelli n Falesṭin ugin ad yeqqel Udabu Afalesṭini γer lemcawṛat tusridin (directes) akked weεdaw iṣrayili skud Isṛayil ur teqbil kra n ccuruḍ ayγef ur yelli wemciweṛ. Gar ccuruḍ-a, imeγnasen ifalesṭiniyen tettren seg Yisṛayiliyen ad ḥebsen akk lebni n tehras (colonies) deg wakal afalesṭini, yerna ad ḥebsen asnulfu n tehras timaynutin deg Ugemmaḍ Utrim (Cisjordanie) akked Lquds, ad ḥebsen tuṭṭfa ed weḥbas n Yifalesṭiniyen deg lbaṭel yerna ad kksen targult-nni (blocus) yeffγen i lqanun ay d-yettuḥettmen γef Γezza. Yuγ lḥal, tuqqla γer lemcawṛat, ama d tusridin neγ d tirusridin (indirectes) akked Yisṛayiliyen netta d aqbal n kennu ddaw uzaglu n weεdaw, yerna, akken ay t-id-yenna Dr. Mustafa Al-Barghouti (Amussu i Ṛṛay Afalesṭini Amaynut), lemmer ad mciwṛen Yifalesṭiniyen ed Yisṛayiliyen taswiεt-a, aya yezmer ad yessefsed akk lemcawṛat ay d-itteddun. Maca γas imeγnasen ifalesṭiniyen la d-ttεeyyinen, Aselway afalesṭini, Mahmoud Abbas ixebber-d, seg melmi kan, γef nneyya-nnes akken ad yettekki deg lemcawṛat timaynutin tusridin akked Uwanak (ddula) aṣehyuni.

 

Amedya n Vietnam

 

Deg wemgaru (ṭṭrad) n Vietnam (1959-1975), kra n zzmen γef yemḍebbren n Viet Cong (yellan ttnaγen akken ad ssuffγen aεdaw amarikani seg tmurt-nsen) imi ay d-bdan lemcawṛat akked Yimarikaniyen, dγa s waya, walan-ten xedεen imenγi i lmend n weslelli (libération) n tmurt. D tidet, imḍebbren n Viet Cong llan ttemcawaṛen ed Yimarikaniyen, maca aya ur yelli d axdaε n yimenγi-nsen akken ad ssuffγen aεdaw seg tmurt. Nnig waya, lemcawṛat gar Viet Cong ed Yimarikaniyen llant ttilint-d γef leḥsab n tegnit deg wenrar n yimenγi., yerna Tirni Taγelnawt n Weslelli n Vietnam n Wenẓul (Viet Minh neγ Viet Cong) d amussu ay llan ttεawanen-t ama d Ivietnamiyen n ugafa (nord), ama d wid n wenẓul (sud) yellan ddaw uzaglu n Yimarikaniyen ay asen-yebḍan tamurt.

 

Avietcong yesrusuy lmina deg wakal

 

Lemcawṛat ay d-yellan gar yemḍebbren n Viet Cong ed Yimarikaniyen steṛḥben yes-sent yiγerfan n umaḍal, ma d imeṛkantiyen, ayt tedrimt akked ttawilat n yisalan n utaram (lγerb) bran-d i lḥemla-nsen tamsirit (raciste) n ucemmet n Yevietnamiyen n Viet Cong. Tasertit, iswan n yimenγi, tasuddest n wezbu (stratégie de résistance) akked ttaktiyin n temgarut (tactiques de guérrilla) ay sseqdacen yimeγnasen n Viet Cong llan banen akk.  Lemcawṛat ay d-bdan Yevietnamiyen akked Yimarikaniyen kecmen deg ukemmel n yimenγi i lmend n ussuffeγ n weεdaw seg tmurt ay yeṭṭef. Ivietnamiyen werjin mcawaṛen ed Yimarikaniyen i wakken ineggura-a ad ḥebsen kan aḍegger n lbumbat-nsen γer yiγfawen n medden, wanag Ivietnamiyen cerḍen seg Yimarikaniyen ad ffγen seg wakk akal n Vietnam n Wenẓul (sud), yerna d wa ay d iswi ameqran n lemcawṛat-nsen.

 

S waya, imenγi i lmend n tlelli n Vietnam, am yimenγi i lemnd n tlelli n Ldzayer, d sin n yimedyaten (exemples) ay yessekf γef wakk iγerfan (ccuεub) ad ten-ḍefren akken ad sseddun imenγi-nsen imselleḥ mgal wid ay asen-yeṭṭfen tamurt, yerna lemcawṛat ttilint-d i lmend n uεiwen n yimenγi imselleḥ ay d-yettilin deg wenrar akken ad yaweḍ γer yeswi-nnes.

 

Imtawayen* n Oslo

 

*accords

 

D acu kan, Tuddsa n Weslelli (Organisation de la Libération) n Falesṭin ur d-tgir tiγawsiwin-a deg leḥsab, yerna tger iman-nnes war axemmem deg tfextin n Oslo akked yemtawayen (accords) n Camp David (2000), yerna mazal-iten ar ass-a weḥlen deg-sent. Yuγ lḥal, Adabu Afalesṭini d tamṣuka n tedbelt (structure administrative) ay d-snulfan yisṛayiliyen yerna ḥettmen-tt γef Yifalesṭiniyen deg yemtawayen n Oslo. S wesnulfu n Udabu Afalesṭini, Ifalesṭiniyen qeblen ad ssersen tamurt-nsen ddaw tecḍaḍt n weεdaw Isṛayili war ccwal. Ccγel n Udabu-a netta d d asseddu n tγawsiwin n yal ass n Yifalesṭiniyen yettwaḥebsen deg tfawtin n wakal yettwaẓerrben ama deg Γezza, ama deg Ugemmaḍ Utrim (Aγerbi), neγ deg temdint n Lduqs Tagmuḍant (tacerqit) aydeg ttwaḥebsen ugar n 4 n yimelyunen n Yifalesṭiniyen ur nesεi izerfan, wala tazmert akken ad ḍebbren deg tγawsiwin-nsen s tlelli, ur zmiren ad ddun sanda ay asen-yehwa, yerna zemren ad d-asen Yisṛayiliyen seg tedqiqt γer tayeḍ akken ad ten-ẓẓεen ed ad asen-hudden ixxamen-nsen akken « ad ssizedgen » tamurt seg-sen.

 

Rabin ed Arafat deg Washington deg 1993

 

Tagnit-a n twaγit aydeg yella weγref (cceεb) afalesṭini tasebba-nnes d lemcawṛat n Oslo. Maca amek ay tella Falesṭin qbel ad bdunt lemcawṛat-nni n Oslo timezwura deg 1993 ? Amek ay tella qbel tegnit n Yifalesṭiniyen qqbel ad ttustenyin yemtawayen (accords) n Washington (Oslo II) deg Ctembeṛ 1995 ?

 

Zik, qbel ad d-ilint lemcawṛat-nni, llan yiserdasen isṛayiliyen d nitni ay d-iḥettmen ṛṛay-nsen deg wenrar. Llan sεan ljehd d ameqran, sεan imrigen (leslaḥat) nnig n wayen yessekfen, Imarikaniyen bedden s idis-nsen, yerna ula d Isṛayil tesεa aẓeḍḍa-nnes n yigensaten imaγlayen (satellites-espions), iṛadaṛen n tεessast, idṛunen (drones) akked yemrigen ineflayen (sophistiqués) ayyes zemren ad sefḍen aṭas n leṛwaḥ. Deg tallit-nni, Isṛayil teṭṭef akk akal n Falesṭin taqburt (yellan ddaw leεnaya tabriṭanit), yerna tella tettemmeγ ula γef tmura niḍen ama deg Wegmuḍ (Ccerq) Alemmas, ama anda niḍen (am Surya, Maṣer, Lεiraq, Libya, Tunes, atg.). Imeẓla uffiren (services secrets) n Isṛayil llan smeḥsisen yerna ttεassan deg yal amkan, am wakken ay llan neγγen win ay asen-yehwan deg tmurt ay asen-yehwan deg umaḍal. Igen (armée) isṛayili akked Mossad llan ttbanen-d yiwen ur yezmir ad ten-yernu.

 

Γas igen (armée) isṛayili yella yeccuṛ d isadaren (professionnels) yennumen imenγi, maca werjin ssawḍen ad snegren imeγnasen ifalesṭiniyen n Ugemmaḍ Utrim (Cisjordanie) akked Γezza. Γef wakken d-ttinin kra, igen isṛayili d netta ay d igen wis 4 ijehden akk deg umaḍal, maca γas akken, werjin yessaweḍ ad yernu imeγnasen ay ibedden deg wudem-nnes deg wakal-nni yagi ay yeṭṭef. Asmi ay tenker Lintifaḍa tis snat (2000), imeγnasen ifalesṭiniyen fkan-as tiytiwin tiqerḥanin i Isṛayil ula deg wul n temdinin-nnes timeqranin am Tel-Aviv, Lquds akked Ḥayfa. Zik, imḍebbren n Tuddsa n Weslelli n Falesṭin (OLP) llan deg lγerba yerna seg-inna ay llan ttweṣṣin-d akken ad ttunefkent tiytiwin i yiṣehyuniyen. Imḍebbren n yimenγi imselleḥ llan deg Ugemmaḍ Utrim akked Γezza, ffren am yiselman deg waman gar wegdud afalesṭini ay yellan itteṣṣer-iten γef Yisṛayiliyen ay yebγan ad ten-nγen. D acu kan, γas tagnit tella deg lfayda n Yifalesṭiniyen, deg wass n 15 Nwembeṛ 1988, Aseqqamu aγelnaw afalesṭini wis 19 yemlal deg temdint n Ldzayer yerna yesteεṛef s Uwanak (ddula) isṛayili deg tlisa-nnes n 1967, am wakken ay d-yesseγret (declarer) Useqqamu-a s ussebded n Uwanak afalesṭini aydeg ddukklent kra seg tmiwa taεṛabin n Falesṭin taqburt (Lquds Tagmuḍant [tacerqit], Γezza akked Ugemmaḍ Utrim).

 

Yuγ lḥal, iban imeγnasen ifalesṭiniyen ur zmiren ad rebḥen amgaru (ṭṭrad) aydeg ara nnaγen udem s udem ed yigen (armée) isṛayili. Leqdic imselleḥ n yimeγnasen yezmer kan ad yeḥṛes isṛayiliyen ed ad ten-yejj ur ttḥulfun i laman ama deg temdinin tifalesṭiniyen yettwaṭṭfen, ama deg tehras (colonies) ay zedγen Wudayen, yerna leqdic-a d win ara yejjen Ifalesṭiniyen ad ṛjun arma d asmi ara ten-id-tṣaḥ tegnit yelhan ugar akken ad zemren ad rnun aεdaw-nsen. Deg tallit-nni tazniwt (propagande) tisṛayilit tella tezga tessawal γef wuguren n laman n Isṛayil, yerna aya ur yelli deg lbaṭel. Yuγ lḥal, leqdic imselleḥ afalesṭini d win yejjan Isṛayiliyen ur ttafen akk rriḥa n laman deg tudert-nsen, yerna d aya ay d-inejṛen abrid i Yifalesṭiniyen akken ad ssiwḍen ad ssuffγen aεdaw seg tmurt-nsen. D acu kan, aya yella itteddu ad d-yili akked wakud, imi Isṛayiliyen ur zmiren ad ttwarnun s wemrig (leslaḥ) γef teswiεt. Lemmer ad ṣebren Yifalesṭiniyen, akud ad ibeddel aṭas n tγawsiwin seg-a γer sdat. Yuγ lḥal, aγref (cceεb) afalesṭini yella yettnerni s tazzla yerna aya d ayen ara yuraren dduṛ deg werbaḥ n weεdaw-nsen. Ma d timetti tisṛayilit, seg tama-nnes, gant-tt-id trebbaε yemgerraden ama deg laṣel, ama deg uxemmem, yerna zgant ur msefhament gar-asent, yerna ula d aya yezmer ad yili deg lfayda n Yifalesṭiniyen seg-a γer sdat. Asmi ara d-yaweḍ wass aydeg ara ifak upitṛul deg Wegmuḍ (Ccerq) Alemmas; tama-a ur tseεεu azal ameqran γer Yimarikaniyen ay yettεawanen Isṛayil, dγa Imarikaniyen ad ḥebsen aεiwen-nsen. Daγen, tezmer, yiwen wass, ad d-tili tezγint tudmist (crise économique) tameqrant ara yesḍeεfen tizemmar n tedrimt n Yimarikaniyen, dγa, ula imir-nni, ur zemmren ad kemmlen aεiwen-nsen i Isṛayil. Seg tama niḍen, akked wakud, aṭas n yiduba imerka aεṛaben ara yeγlin yerna ad ifak wemεiwen-nsen n tixxubta akked Yisṛayiliyen.

 

Tagnit n yimenγi aydeg llan Yifalesṭiniyen deg wenrar ur telli d tin iwutan i lmend n lemcawṛat n “talwit” akked weεdaw isṛayili deg Oslo. Yuγ lḥal, lemcawṛat am ti s ṛṛay amarikani d tid kan ay izemren ad ssiwḍent imḍebbren ifalesṭiniyen γer kennu ddaw uzaglu isṛayili, yerna akka ay yella lḥal.

 

Deg Oslo, Tuddsa n Weslelli n Falesṭin (OLP) teεzem ad teg ayen ur ssawḍen ad t-gen yiserdasen isṛayiliyen akked Mossad: d imḍebbren ifalesṭiniyen ay yeqqlen ttqaqaren imeγnasen imsellḥen yeffren gar weγref (cceεb), ttnadin fell-asen, ttaṭṭafen-ten, ḥebbsen-ten, ttεettiben-ten yerna neγγen-ten. Ala d imeẓla (ssrabes) n laman n Udabu Afalesṭini ay yellan yessen anrar akken iwuta i wakken ad inadi γef yimeγnasen ifalesṭiniyen, d acu kan, γas akken, ur ssawḍen ad ten-snegren.   

 

Deg Oslo, deg wakud aydeg Adabu Afalesṭini ṛeggmen i Yisṛayiliyen ad snegren imeγnasen imsellḥen, Isṛayiliyen ṛeggmen i Yifalesṭiniyen ad asen-fken azal n 18% seg wakal n Falesṭin ara yilin ddaw n udabu afalesṭini, maca ddaw tili n ubeckiḍ isṛayili. Akal-a llant deg 6 n temdinin taεṛabin akked wakal n Γezza, am wakken ay ṛeggmen Yisṛayiliyen i Udabu Afalesṭini ad d-ilint lemcawṛat niḍen gar-asen, d tid ara yessiwḍen γer tlalit n Uwanak-nni (ddula) afalesṭini ay yella yettargu-t Arafat. Deg 2001, 8 n yiseggasen sdeffir n kennu n yemḍebbren ifalesṭiniyen ddaw uzaglu n Oslo, Ariel Sharon yeṭṭef adabu deg Isṛayil. Sharon yella yettwali Isṛayil tsemmeḥ aṭas seg “umur”-nnes i Yifalesṭiniyen, yerna yettuqenneε mazal yella wamek ay zemren Yisṛayiliyen ad rnun ad d-kksen akal i Yifalesṭiniyen. Yasser Arafat yeffeγ-it leεqel, ma d iγallen imsellḥen ifalesṭiniyen bdan ttalsen ttṣeggimen iman-nsen maca beṛṛa i tecḍaḍt n Tuddsa n Weslelli n Falesṭin (OLP), ladγa imi ula d agdud afalesṭini ur yeqbil ayen ay d-iṣaḥen Falesṭin seg tefxet-nni n lemcawṛat n Oslo. Γas imḍebbren imarikaniyen ugin, Ariel Sharon yeεzem ad d-yebdu tikli taqesḥant akked Yifalesṭiniyen, dγa iga tummγa tameqrant aydeg yerẓa asagen (lmerṣa) akked unafag (aéroport) n Γezza, yerna ihudd tidumṣukyin (infrastructures) ay tebna Tdukli Tuṛufit i Udabu Afalesṭini. Ma d lemcawṛat-nni ay ṛeggmen Yisṛayiliyen i Yifalesṭiniyen werjin llint-d.

 

D ta ay d tagnit aydeg llan ass-a Yifalesṭiniyen, deg wakud aydeg Imarikaniyen mazal bγan ad d-rren tudert i lemcawṛat tusridin (directes) gar Udabu Afalesṭini ed Uwanak (ddula) aṣehyuni, d tin aydeg ara qeblen, Yifalesṭiniyen ad jjen imenγi ed ad knun ddaw uḍar n Isṛayil i lebda.

 

D acu ay d-yellan seg Oslo d asawen ?

 

D acu ay ibeddlen seg wasmi ay d-llant lemcawṛat n Oslo ar ass-a ? Seg wasmi ay ttustenyan yemtawayen (accords) n Oslo, tirebbaε n yimeγnasen imsellḥen ifalesṭiniyen εawdent ṣeggment iman-nsent beṛṛa i tecḍaḍt n Udabu Afalesṭini. Yiwet seg trebbaε-a timeqranin d Ḥamas, am wakken llant azal n 10 n trebbaε timsellḥin niḍen ay yekkaten i lmend n weslelli (libération) n Falesṭin. Leqdic-nsent yemgerrad s waṭas γef win n yixeddaεen ifalesṭiniyen ay iqeddcen akken ad as-ddun deg lebγi i weεdaw isṛayili. Imeγnasen imsellḥen ifalesṭiniyen ugin ad steεṛfen s “yemtawayen (accords)” n tkellax ay testenya Tuddsa n Weslelli n Falesṭin war ma tcaweṛ agdud afalesṭini. Ma d Adabu Afalesṭini, seg wasmi ay d-yennulfa, yelha-d kan s usseddu n kra n temdinin tifalesṭiniyin yettwaḥebsen deffir yiγerban, yerna, deg 2006, adabu-a teγli yes-s asmi ay yerbeḥ umussu n Ḥamas tifranin timagdayin (décmoratiques). Yuγ lḥal, yiwen ur yebni d Ḥamas ara irebḥen deg tefranin-nni, yerna γas ma yella llant-d s webrid n tugdut, Isṛayiliyen akked kra n tmura tutrimin (tiγerbiyin) ugint ad steεṛfent yes-sent. Seg wass-nni s ass-a, leqdicat isṛayiliyen i lmend n tuṭṭfa n wakal afalesṭini nnernan s waṭas. Isṛayiliyen snernan, daγen tinqiḍin n ufettec n Yifalesṭiniyen deg webrid, am wakken ay rnan ṭṭfen yerna ḥebsen aṭas n Yifalesṭiniyen, ma d sin-nni n yiγerban ayyes ttwaḥebsen yimezdaγen n Wegmuḍ Utrim (Cisjordanie) akked Γezza, sjehden-ten Yisṛayiliyen, yerna ḥettmen-d targult (blocus) ay igezmen akk lerbaḥ γef Γezza. Isṛayil tesnerna, daγen, leqdicat-nnes n tuẓẓεa n Yifalesṭiniyen seg temdint n Lquds, yerna tuṭṭfa n wakal afalesṭini werjin yeḥbis, am wakken ay werjin teḥbis Isṛayil seg lebni n yexxamen i yemhuras (colons), γas ma yella Netanyahu ed Liberman ḥekkun-d akken niḍen.  

 

Ahuddu n yexxamen deg Bartaa Sharqiya, Falesṭin 

 

Ma d tizemmar tiserdasiyin n Yifalesṭiniyen ur nnernant arma d aswir (niveau) ara ten-yejjen ad mmγen γef yeεdawen iṣehyuniyen deg wakk timiwa n Falesṭin (ula deg wakal yettwaṭṭfen deg 1948, seg wasmi ay d-llant lemcawṛat n Oslo s ass-a.

 

Yuγ lḥal, seg wasmi ay d-llant lemcawṛat-nni, yeqqel yella wemgerrad d ameqran gar ljehd n yiγallen isṛayiliyen ed win n yiγallen n yimeγnasen ifalesṭiniyen, d acu kan, mazal yella ussirem i wakken Ifalesṭiniyen ad ssiwḍen ad rnun Isṛayiliyen ula seg yidis n yimenγi imselleḥ. Imeγnasen imsellḥen ifalesṭiniyen nnejmaεen γer Γezza, anda ay ssawḍen ad qqimen deg udabu γas akken Taselwit (présidence) n Udabu Afalesṭini teεreḍ ad ten-teseγli deg 2007. Ma deg Ugemmaḍ Utrim (Aγerbi), Taselwit n Udabu Afalesṭini tessaweḍ ad teṭṭef adabu s ccwal-nni ay d-yellan deg useggas-nni yerna s uεiwen n Yisṛayiliyen. Yuγ lḥal, Isṛayil teṭṭef yerna teḥbes azal n 30 n yimazanen (députés) ifalesṭiniyen n Ḥamas s ṛṛay n Udabu Afalesṭini, yerna aṭas n yimeγnasen ifalesṭiniyen ay yekkaten γef tmurt-nsen ay yettwanγan. S waya, imeγnasen qqlen qeddcen s tuffra, rewwlen ama γef yiduba (autorités) isṛayiliyen, ama γef wid n Tselwit (présidence) tafalesṭinit ay yeddan ed Isṛayil, yerna εerrḍen ad alsen ad ṣeggmen iman-nsen akken ad kemmlen imenγi.

 

Yessekf ad nger tamawt γer yiwet n tγawsa s wazal-nnes : iserdasen isṛayiliyen ttwarnan snat tikkal deg Lubnan, deg 2000 ed 2006. Nnig waya, tadamsa tisṛayilit simal tettcewwil. Imarikaniyen xuṣṣen-ten yedrimen yerna bdan ssenqasen ayen ttṣerrifen γef tsertiyin-nsen deg Wegmuḍ (Ccerq) Alemmas, γas ma yella mazal aεebbuḍ-nsen meγγer. Ma d tarbaεt n tmura ay ibedden deg wudem n Isṛayil, tin aydeg tella Iṛan, Surya, Tteṛk akked Lubnan, simal trennu tettimγur, deg wakud aydeg imeddukal n temnukda (impérialisme), simal neqqsent tzemmar-nsen. S waya, Isṛayiliyen ur d-ufin taγawsa niḍen ara gen menγir astixer n yimeksawen aεṛaben n uneẓruf (ṣṣeḥra) n Naqab seg tmiwa-nsen tineṣliyin, imi ay ugaden lemmer ad frurxen yerna ad agaren Udayen deg kra n tmiwa.

 

Γas ma yella Isṛayil tezmer ad terbeḥ amgaru (ṭṭrad) aydeg ara temqabel udem s udem ed wexṣim-nnes, maca ur tezmir ad ternu imeγnasen yettnaγen deg temdinin, am wakken ur yezmir ad ten-tessenger. Γef waya ay bγan yemḍebbren iserdasiyen isṛayiliyen ad qqlen γer lemcawṛat tusridin akked uselway afalesṭini Mahmoud Abbas, qbel ad tfak tallit-nnes n udabu. Yuγ lḥal, Isṛayiliyen bγan ad stenyin akked Abbas amtawa (accord) ayyes aselway afalesṭini ad yesteεṛef s tuṭṭfa tisṛayilit. Sakkin, d amtawa-a ara teqqel Isṛayil ad t-tesskanay i Yifalesṭiniyen n uzekka akken ad asen-d-tessken amek ay yeqbel yemḍebber-nsen ad asen-yessenz akal n wegdud-nnes, yerna, Isṛayiliyen bγan, ladγa, ad isemmeḥ uselway afalesṭini deg wezref n Yifalesṭiniyen n 1948 akken ad qqlen γer tmurt-nsen.

 

Ayen ara tebγu Isṛayil deg lemcawṛat ay d-itteddun

 

I wakken ad teẓrem d acu ayγef tebγa Isṛayil ad temciweṛ deg lemcawṛat-a n « talwit » ay bγan Yimarikaniyen, Isṛayiliyen, Tuddsa n Weslelli n Falesṭin (OLP) akked Temγunt (Ligue) Taεṛabt, yessekf ad d-tsukkem tiṭ γef teẓrawit-a (vidéo) n “hasbara (tazniwt [propagande] tisṛayilit, d tin aydeg tebγa Isṛayil ad d-tessewjed agdud isṛayili akken ad yeqbel “ad yefk aṭas n tγawsiwin d asfel” ed ad isemmeḥ seg weḥric n seg wakal n Isṛayil Tameqrant ay iṛeggem Ṛebbi ad tt-yefk i Wudayen (http://www.youtube.com/watch?v=ytWmPqY8TE0).

 

Taẓrawit-a (vidéo), d igen (armée) isṛayili ay tt-id-igan. Tesskanay-d Isṛayil d asadur (base) aserdasi ameqran ay d-yezgan gar yiγerfan (ccuεub) aεṛaben ed yinselmen ay as-yebγan cceṛ. Nnig waya, tessefham-d amek ara tettwafru temsalt n tlisa n usadur-a, imi, γef leḥsab n udabu isṛayili, tilisa n wakal ur llint γef leḥsab n Yiwunak (ddulat) neγ n yemdanen ay yettalasen deg wakal-nni, wanag akken ay asen-yehwa i Yisṛayiliyen. D acu kan, mi ara d-neqqel γer tidet, d acu n wezref ay sεan yiṣehyuniyen deg wakal n tmura n Wegmuḍ (Ccerq) Alemmas, yerna seg melmi ay t-sεan ? D acu-ten wassaγen (rapports) ay sεan yimezdaγen γer wakal-a neγ γer wakal-inna deg tama-a ? D acu-ten yizerfan igraγlanen n yimezdaγen n wakal-a neγ n wakal-inna ? D acu-t umezruy n yimezdaγen n wakal-a neγ n wakal-inna, yerna seg melmi ay ddren deg yikallen-a ? D ti ay d tuttriwin ay yessekf weγref ad tent-yetter γef yiman-nnes qbel ma yebna Awanak (ddula) yerna ad as-yesserked tilisa, maca Isṛayiliyen smenyafayen ad rewlen i tuttriwin am ti.

 

Taẓrawit-a (vidéo) n “hasbara (tazniwt [propagrande] taṣehyunit)’’ n yigen (armée) isṛayili tessawal γef wayen niḍen. Taẓrawit-a tessefham-aγ-d amek ara d-ilal Uwanak (ddula) afalesṭini yebḍan d ifettiten, ed wamek ara yili ddaw tecḍaḍt n Isṛayil ed yibeckiḍen-nnes. Awanak-a ur iseεεu igen, wala imrigen (leslaḥat); ur iseεεu isafagen (ṛṛublanat), wala tallunt n yigenni (espace aérien); ur iseεεu asagen (lmerṣa) wala tifsirin (côtes), wala iγerruba. Nnig waya, iγzer n wasif n Luṛdun (ay d-yezgan gar yifettiten-nni n wakal ara yeqqlen d Awanak Afalesṭini akked tmurt n Luṛdun) ad yeqqim ddaw udabu Isṛayili i lmend n weḍman n laman n Isṛayil. Nnig waya, i wakken ad qqimen Wudayen d nitni ay d tigti (majorité) deg wakal ay yettwaqqnen γer Isṛayil, akk Ifalesṭiniyen yettwaẓẓεen seg tmurt-nsen werjin ad zemren ad d-qqlen γer-s. Yuγ lḥal, ma jjan Yisṛayiliyen ad yeḍru waya, ass-nni d tagara n Isṛayil, imi ara tesṛuḥ “tudayt”-nnes.

 

Ihi, d acu-tt lfayda n wemciweṛ ed weεdaw isṛayili ?

 

Ihi, deg tegnit am ta, iwuta ma kecmen Yifalesṭiniyen deg « lemcawṛat tusridin [directes] » akked Yisṛayiliyen ? Ih, ma yella bγan Yifalesṭiniyen ad ten-id-ṣaḥent kra n tfettitin n wakal aydeg llant kra n temdinin yettẓerrben s yiγerban ddaw yibeckiḍen isṛayiliyen. Ala, ma yella iswi n Yifalesṭiniyen netta d aslelli (liberation) n weγref (cceεb) afalesṭini ed wakk akal n Falesṭin ay yettwakren deg 1948 akked yiseggasen ay d-iḍefren.

 

 

Aγref (cceεb) afalesṭini yessekf ad yagi lemcawṛat-a n kennu ddaw uzaglu n weεdaw, yerna ad yeṭṭef deg wakal-nnes. Yessekf ad ikemmel imenγi war ma yefcel ed ad yesseqdec akk iberdan n talwit akked yiberdan n yiγil umi yezmer. Ur yessekf ad isemmeḥ deg wacemma yerna ur yestenyay acemma, wanag yessekf ad yeεreḍ ad d-yerbeḥ akud. Seg-a γef 50 n yiseggasen, aṭas n tγawsiiwn ara ibeddlen deg umaḍal, yerna skud Ifalesṭiniyen ur semmḥen deg yizerfan ay asen-yefka ccṛeε, ur yelli wayen ara xeṣren, wanag, adennit (labudd) ad ten-id-tṣaḥ tegnit aydeg ara rebḥen imenγi-nsen. 

 

Sγur Robert Bibeau

Tasuqilt : Omar Mouffok (Tiddukla Tadelsant Imedyazen – www.imedyazen.com)

Taγbalut: mondialisation.ca

 

 

 

Comments (0)

You don't have permission to comment on this page.