Sɣur: Djaafar Messaoudi

17 Ctembeṛ 2010

Qqaren wayt zik, llan tikkelt sin waytmaten ; yiwen isem-is Meğğkan, wayeḍ isem-is Mawidkan.

Meğğkan d nneyya, ixeddem үef twacult meṛṛa. Ma d Mawidkan d bu-tḥila, yettxemmim kan i uzekka. 

Asmi yemmut babat-sen, yejja-d seg yal lxir atmunen. Meğğkan үur-s takti, yenna i gma-s ahwawi: "Ad yerḥem Ṛebbi baba-tneү n lεali, ay aү-d-yejjan akk aya. Deg-neү tajmilt yuksan-itt, ad as-tt-nerr ma tadrimt-is nessefti-tt". 

Ineggez Mawidkan s wurrif: “Jmaεliman afus-ik ur ten-yesṛif. Wa d baba-inu, ayla-s inu, kecc ur telliḍ d gma-inu”.

Meğğkan ibat seg wayen la isell, yugad idim ad yazzel, yeṭṭef abrid-is iүawel, үer wayt Ṛebbi, issuүel, ad as-d-ciren үef win ay as-yesswen aүbel. Deg webrid-is yemlal-d win үer-s Ṛebbi yuzen-d. Yesseqsa-t ed yimeṭṭi  itturug-d: “A kečč umi zeddig wudem am lmelk, talwit melmi ara iyi-d-tettunefk? Ma mazal gma ad yedder, tuүalin ur tt-id-bedder”.

Yenṭeq umexluq-nni yini-as: “Tlatin iseggasen i d-mazal-as”. Tүaḍ-it twacult-is ay n-yejja i udeүli. Yemmuqel Meğğkan үer igenni, yini:”Wekkleү-ak a gma Ṛebbi”. Sakkin үer wexxam yebda-d tikli.

Ɣer tewwurt temmuger-it-id tmeṭṭut-is, seg yimeṭṭi yejreḥ yeẓri-s: “Melmi ara aɣ-ifak Ṛebbi seg ẓẓur ?” “Sbeṛ kan, d aya ay aү-d-isaḥen d amur, tlatin yiseggasen werεad bdin”.

S igenni terfed tmeṭṭut izri-is ineggin: “wekkleү-ak Ṛebbi a win yeccan gma-s d amuddir, nekni neshel-ak, Ṛebbi d uwεiṛ”.

Sakin үer tүerүert, temmuger-it-id yelli-s, tettel tyersi deg tgerjumt-is: “A baba, melmi ara d fell-aү teflali?” "Sbeṛ kan a taεzizt-iw, a yelli, akka tlatin yiseggasen, ur d-icerreq, ur t-nettwali”. Ɣer yigenni terfed teqcict iẓri-is yesmeqqin: ”Wekkleү-ak Ṛebbi a εemmi ur yellin d aḥnin”. 

Azekka-nni kan yesselqef Mawidkan, tbat twacult n Meğğkan. Ɛni skiddiben wayt Ṛebbi ? Yeṭṭef abrid үur-sen ad ten-yesseqsi. Deg ttnaṣfa n webrid, yemmuger-it-id lmelk-nni. “A mazal-ik themmleḍ ula d ass-a ? Yak kfan fell-ak yiүeblan tura!” “Usiү-d ad iyi-d-tessefruḍ adrug-ik. Yak tenniḍ tlatin yiseggasen ay d-yeggran akken ad faken fell-i ineẓman ?”. “Smuzget ihi mliḥ akken ad tfehmeḍ: aql-iken deg twacult-ik deg tlata, yal ma yiwen deg-wen iwekkel Ṛebbi i winna, nekẓen-d deg leɛmer-is εecṛa yiseggasen dinna. Ma d Ṛebbi ur ittettu ara win deg-s yessutren kra”.

Sɣur Djaafar Messaoudi

Amagrad ay d-itteddun: 

Taṣehyunit – Ur yelli wemgaru - ur telli talwit (sɣur Amar Djerrad)

Qqel ɣer wegbur : 

Taftilt Taliktṛunit - Uḍḍun 1

Qqel ɣer usebter n umager.