Sɣur Hamid Oubagha
1. Yettarra iẓerman-is s ufus-is : iferru tilufa n wexxam-is melba ma slan medden. Ur isawal ara i medden ad frun gar-as ed wayla-is. Ur yettanef ara i medden ad d-walin leɛyub-is. Mi ara d-nini ɣef at wexxam, neɣ atmaten neɣ argaz ed tmeṭṭut “ttarran iẓerman-nsen s yifassen-nsen” anamek-is ur ttajjan ara i wis tlata neɣ abeṛṛani ad d-yekcem gar-asen neɣ ad d-iger iman-is ad ten-yefru.
2. Ad geɣ ifadden i temrart : d awal ay neqqar mi ara nessebɣas mebla lfayda win yugin ad yebges ɣef yiman-is ad yeẓwer. Mi ara yili walebɛaḍ yebra i yiman-is, ur yesɛi ara ul i kra yerna hdeṛ neɣ qim ad as-tiniḍ ( s ttiha) : ad geɣ ifadden i temrart ! Yuɣ lḥal tamrart akken tebɣuḍ tesbeddeḍ-tt ar d-tekkseḍ kan afus-ik a bnadem ad teɣli acku ur tezmir ara ad tessebded iman-is s yiman-is.
3. Tettuqim alim ger yijeqduṛen : ttekk-d ger yiɛeyyalen n wexxam ammar ad d-yili umennuɣ. Txeddem akken ara tezḍ tagmat ed lemḥibba ger at wexxam, ama d atmaten ama ger dderya ed yimawlan ama ger wergaz ed tmeṭṭut neɣ s umata wid akk ay wumi yefka lḥal ad idiren akken. Neqqar-as uqem alim ger yijeqduṛen I waken ad as-nini nettnadi kan ad nsemṣalaḥ. Netta alim ay d-itekken ger yijeqduṛen i wakken ur ttemḥazen ara ma ulac ad rẓen.
4. Ur keccem ara ger yiccer ed weksum : ur ggar ara iman-ik ger wid yemqaraben neɣ ay yecrek wayen ay k-yexḍan. D amedya mi ara yennaɣ uɛeyyal n wexxam ed gma-s n yemma-s neɣ baba-s sakk-in ad yekk gar-asen wis tlata ur neqrib wa ugar n wa ad as-nini i waken ad d-yekk seg tama n yiwen deg-sen ad as-nini awal-a. Netta qqaren zik wis tlata d wis n tlufa. Yezmer ad d-yernu tilufa I wid yemxaṣamen am wakken yezmer ad d-yawi i yiman-is n tmara ur t-nerri. Ur ilaq ara ad nger iman-nneɣ deg wayen icrek wiyaḍ ed ur d aɣ-neɛni ama i wakken ad tt-nerwi gar-asen s ttɛammda ama acku nefka lḥeqq I yiwen deg-sen. S uzekka ad myuɣalen sin-nni yemxaṣamen ad d-yeqqim wis tlata ay igren iman-is gar-asen ad t-zzmen ad as-inin “tɛerḍeḍ ad tt-tessekreḍ gar-aneɣ”.
5. Tikli n wergaz s axxam-is : awal-a neqqar-it i wakken ad d-neglem (ad d-newṣef) tikli n win ur nettḍeyyiɛ ara lweqt-is deg wayen ur nemɛin ed uzihnen. Mi ara nger tamawt i win ur nezzihnin ara deg lecɣal-is, i win ur nezzuɣur ara iman-is s teɛgez ed tiffenyent, ad as-nini tikli-is d tikli n wergaz s axxam-is ! . Acuɣer ay as-neqqar akk-a ? Acku argaz imeɛnen mi d-yekfa lxedma-is ad d-yerr s axxam-is, ad d-iḥar s arraw-is ed at wexxam-is. Ma d yir argaz ur d-yettḥar ara s axxam, ad yezzihnin beṛṛa, ad n-yettegray deg yimukan icemten am ttbernat ed wandeg yettili yihwah ed yir ameslay. Awal-a qqaren-t i wergaz, ma d tameṭṭut mi ara tili d tameṭṭut ibegsen iḥellsen ur nestehzay ara deg wexxam-is qqaren-as : d tikli n tmeṭṭut ɣer lehl-is. Acimi ay as-qqaren akk-a ? Imi tameṭṭut yelhan, ɣas ad terzef s axxam n baba-s ur n-tekkat deg-in [din] aqiḍun, ad tṛuḥ ad d-teqqim ed yimawlan-is lameɛna teẓra yerja-tt wexxam-is, ur tekkat ara timisit ɣef lecɣal-is.
Hamid Oubagha - 22 Yunyu 2010
Tiddukla Tadelsant Imedyazen (www.imedyazen.com)
Amagrad ay d-itteddun:
Ameslay tawwurt ur d-yekki seg tefṛensist (sɣur Omar Mouffok)
Qqel ɣer wegbur :
Taftilt Taliktṛunit - Uḍḍun 1
Qqel ɣer usebter n umager.
Comments (0)
You don't have permission to comment on this page.